• Dec 31,2021

உலக நிகழ்வுகளை வருங்காலத் தலைமுறைகளுக்கு காலமுறைப்படி நினைவூட்டிடும் வரலாற்றிற்கு அச்சாணியாக ஏசுநாதரின் பிறப்பினை மையமாக வைத்துக் கணக்கிடப்படும் ஆங்கில ஆண்டு 2021 விடைபெற, புத்தாண்டு 2022 பிறக்கின்றது.

இன்பம் பெருகும் – துன்பம் ஒழியும் என்ற நம்பிக்கையுடன் தமிழக மக்கள் ஒவ்வொரு ஆண்டும் புத்தாண்டை வரவேற்று கொண்டாடி மகிழ்கின்றார்கள். கொரோனா வைரசின் புதிய பரிணாமமான ‘ஒமிக்ரான்’ பரவலைத் தடுக்கும் பொருட்டு மக்கள் அனைவரும் தகுந்த பாதுகாப்புடனும் – சமூக இடைவெளியைப் பின்பற்றியும் நடக்கவேண்டும் என இந்நேரத்தில் கேட்டுக்கொள்கின்றேன்.

நாளை பிறக்கவுள்ள புத்தாண்டு  மக்களிடையே அறியாமை எனும் இருளை அகற்றி – ஒற்றுமை என்னும் பலத்தைக் கூட்டுவதுடன், நாட்டில் அமைதியையும் – மேம்பாட்டையும் வளர்க்க நாம் ஒவ்வொருவரும் துணைநிற்க வேண்டும் என கேட்டுக்கொள்வதுடன், அனைத்துத் துறைகளிலும் இந்தியா உயர்ந்த நிலையை அடையவேண்டும் எனக்கூறி, உலகெங்கும் வாழும் அனைத்து சகோதர –சகோதரிகளுக்கும் என் உளம் கனிந்த ஆங்கில புத்தாண்டு நல்வாழ்த்துக்களை தெரிவித்துக்கொள்கின்றேன்.